Weihnachtsgrüße vom Oberlandler Gauverband

Gaach geht’s auf Weihnachtn zua


An zwoarazwanzegsdn hama scho wieda, a baar Dog no und dLeid schrein scho wieda Hellau und Alaaf. Aba hoid, Gott sei Dank gibt’s ja andane aa no. Iatz lossmas zeaschdamoi Weihnachtn wean. Heid hand dia Namensdaag von da Cäcilie (ned zon vowäxln mid da Hl. Cäcilia, 22. Nov. Patronin vo da Muse), da Francesca-Saveria, vo da Jutta und von Marian den Schotten. Gesdan, an Damasdog, hand dia Rauhnachd oganga und dia daun ja bekanntle bis Dreikini.


Staada is warn iatz, da grouß Trube is ume und wea bis iatz seine Sachan ned dado hod, dea dalaafd nia nixmä. Des oa oda anda stehd aba do no o, dWeihnachdsbeichd daad noud, hod da Veichtl gsogd, und da Grischbaam is aa noned gstoin, so wars hoid friaras, heid weada kaaft und oftscho noch dia Feirda wieda „entsorgt“. Aba mi muaß ja ned ibaroi middoa, loosma ins vou Weihnachdn dAvendsliada o und danoch dWeihnachdsliada, loßma an Grischbaam und sGribbä ruahe bis Liamessn steh, wos gehd ins de gschwinde, laude Weid oo?


So wardma iatz, wia oi Jahr, auf de Geburt unsres Herrn, deans kirchle und weidlich andächde und würde feian und hand ins bewußt, dees is a grundlegenda Teil vo insa Leem, vo insan Brauch.