Sonntag is und mia ham Kommunion…

Der Sepp, unser Bua, derf heit zur Erstkommunion. In aller Hergott´s Früh schmeisst uns mei Frau scho raus… Der Seppi is scho wach, weil er so aufgregt is. Er derf heit in da Kirch, an Pfarrer den Wein bringa.. aber jetzt mias ma uns erstmoi herrichten.

Und mia gehn in Tracht, is ja eh klar, da Seppi hat sein ersten Trachtenanzug kriagt. Mei is der fesch…
Um 9 Uhr miasn ma beim Pfarramt sei, denn wir ziagn hinter da Blechmusi in am Kirchenzug in die Kirch ei.. A Scheens Wetter ham ma a…D´Sunn scheint, wos wuilst mehra. Vorher geh ma no zum Fotografieren… Beim Seppi losst die Gsichtsfarbe scho ziemlich aus.. und er werd oiwei stader.

Als ma um 10 nach 9 beim Pfarramt san, had meine liebe Gattin die Kerzen vergessen. Oiso nomoi hoam, und Kerzen hoin. Um hoibe Zehne, kimm i grad noch zum Kirchenzug grecht.. Sauber..
Mei und wia fesch das olle san, die Dirndl´n schaun aus wie kloane Bräut und stolz sans und die Buam fesch beinand. Unser Pfarrer schaut a recht stolz.

In da Kirch derfen die Kinder dann mitmacha, und wern beim Festgottesdienst mit einbunden, a jeder hot a kloane Aufgabe, und wias dann endlich soweit is, dass der Seppi unsern Pfarrer an Messwein bringa derf, is a weiss wia a Wand, und i glab i schau a ned besser aus…
Aber guat macht as…… Sauber mei Bua…
Und ois dann olle in an Kreis stehn und zum ernsten mal die Heilige Kommunion kriagn, da ist mucksmäuserlstad und 30 Kinder ham glanzande Augn….
Kirch is aus und jetzt geht’s zum Wirt… Der Seppi werd reich beschenkt, a Ketterl mit am Kreuz, a Geld von seine Omas und a scheens Gotteslob…

„ Und Seppi sog amoi , wie hats da gfoin die Kommunion…“
„ Mei, schee wars Papa, aber die Kirch hat scho recht lang dauert….

 

Matthias Sellhuber, Gaupressewart Gauverband I